ەتنوگراف بولات بوپاي ۇلى ءساۋىر ايىنىڭ بايىرعى اتاۋىنا قاتىستى پىكىر ءبىلدىردى. ونىڭ ايتۋىنشا قازاق حالقى ءساۋىر ايىن كوكەك دەپ اتاعان.
"ءقازىر ءساۋىر ايى قولدانىلىپ ءجۇر. الايدا باعى زاماننان قولدانىلىپ كەلە جاتقان ايدىڭ اتى – كوكەك. ءساۋىر بولسا امالدىڭ اتاۋى. نەگىزىنەن ءساۋىر ءسوزى اراب تىلىنەن ەنگەن اسپانداعى جۇلدىزدىڭ اتى، دەيدى ەتنوگراف.
ەتنوگراف كوكەك ايىنىڭ اتاۋى كوكەك اتتى جىل قۇسىمەن بايلانىستى ەكەنىن ايتتى.
"وسى ايدا جىل قۇسى كوكەك كەلىپ، "كوكەك، كوكەك" دەپ ءوز اتىن ايتىپ شاقىرادى. سونداي-اق كۇن جىلىنىپ، جەردە كوك كوكتەيدى. ناۋرىزدان كەيىن "ادامنىڭ اۋزى اققا، مالدىڭ اۋزى كوككە ءتيدى"، دەيدى عوي. كوكەك كەلگەننەن باستاپ قۇستاردىڭ جۇمىرتقالاۋى باستالىپ، "ات كوزىنەن كوك كەلدى، ارقان بويى كوك شىقتى، كۇن جىلىندى" دەپ ايدىڭ اتىن كوكەك دەپ اتاعان. توعىسقا قاراپ وتىرىپ تا بايىرعى قازاق كوكەك ايى دەگەن ءسوزدى تاستاماعان. سول سەبەپتى كوكەك ايى بابالارىمىز قولدانىپ كەلگەن اي اتى – كوكەك"، دەپ ءسوزىن اياقتادى بولات بوپاي ۇلى.
